«مەكتەپكە جول» اكتسياسى: جامبىل وبلىسىندا  26 مىڭنان استام بالا ءبىرىنشى سىنىپقا بارادى

ەندى ساناۋلى كۇندەردەن سوڭ التىن كۇز باستالىپ, ءبىلىم ۇيالارى ەسىكتەرىن ايقارا اشاتىن بولادى. جامبىل وبلىسىن­داعى بارلىعى 449 مەكتەپ ءدال قازىر 197 مىڭنان استام وقۋ­شى­نى قابىلداۋعا ساقاداي-ساي ءازىر. اعىمداعى جىلى 26071 ءبۇلدىر­شىن ءبىرىنشى سىنىپ­­تىڭ تابالدىرىعىن اتتاماق. الەۋمەتتىك الەۋەتى ارقيلى دەڭگەيدەگى وتباسىلارىنان شىققان بالالاردىڭ مەكتەپكە بىردەي دايىندىقپەن كەلۋىن قامتاماسىز ەتۋ ءۇشىن تامىز ايىنىڭ باسىنان باستاپ, وبلىس قالالارى مەن ەلدى مەكەندەرىندە رەسپۋبليكالىق «مەكتەپكە جول» اكتسياسى اياسىندا از قامتىلعان جانە كوپ بالالى وتباسىلارىنا جەرگىلىكتى بيۋدجەت جانە دەمەۋشىلەر ەسەبىنەن قولداۋ كورسەتىلىپ كەلەدى. وبلىستىڭ ءبىلىم سالاسىنا قاتىستى ءبىلىم مەكەمەلەرىنىڭ عي­ماراتتارىن جاڭارتۋ, كۇردە­­لى جانە اعىمداعى جوندەۋ جۇمىستارىن وتكىزۋ, ولاردىڭ ماتەريالدىق-تەح­نيكالىق بازاسىن نىعايتۋ سياقتى كەشەندى ماسەلەلەردىڭ شەشىمىن تابۋ ءىسى ۇدايى باستى نازارعا الىنۋدا. سونىڭ ءبىر ناقتى ايعاعى رەتىندە, بۇگىنگى تاڭدا, وڭىردە جوبالىق-سمەتالىق قۇنى 7,4 ميلليارد تەڭگەنى قۇرايتىن 24 ءبىلىم نىسانىنىڭ قۇرىلىسى جۇرگىزىلىپ جاتقانىن ايتساق تا جەتكىلىكتى. سونىڭ ىشىندە ءبىر مەكتەپتىڭ قۇرىلىسى جۋىردا اياقتالىپ, پايدالانۋعا بەرىلگەن. 1 قىركۇيەكتە سەگىز مەكتەپتىڭ وقۋ­شىلاردى قابىلداۋعا تولىق ءمۇم­كىندىگى بولادى دەپ كۇتىلۋدە. ال بەس بالا­باقشانىڭ عيماراتى جىل اياعى­نا دەيىن قۇرىلىسى اياقتالىپ, پايدا­لانۋعا بەرىلەدى. قالعان 10 ءبىلىم ۇياسىنىڭ قۇرىلىسىن 2016 جىلى اياقتاۋ مەجەلەنۋدە. سول سياقتى, بيىل ون مەكتەپتى كۇردەلى جوندەۋدەن وتكىزۋ ءۇشىن 532,7 ميلليون تەڭگە, ال 169 مەكتەپتە اعىمداعى جوندەۋ جۇمىستارىن جۇرگىزۋ ءۇشىن 391372 مىڭ تەڭگە قارجى ءبولىنىپ, تولىق يگەرىلدى. سون­داي-اق, وبلىس مەكتەپتەرىنە جالپى سوماسى 81,1 ميلليون تەڭگە تۇرا­تىن 4 فيزيكا, 7 بيولوگيا, 2 حيميا, 10 لينگا­فون­دىق جانە مۋلتي­مە­ديالىق كابي­نەت­تەرى ساتىپ الىنعان. ەلباسىنىڭ ءبىلىم سالاسى مە­كەمەلەرىنىڭ الدىنا قويىپ وتىرعان باستى مىندەتتەردىڭ ءبىرى – وقۋشىلاردى وقۋلىقتارمەن قامتاماسىز ەتۋ ماسەلەسى. ونىڭ شەشىمىن تابۋ ءۇشىن بيىلعى وقۋ جىلى قارساڭىندا وتكىزىلىپ جاتقان رەسپۋبليكالىق «مەكتەپكە – وقۋ­لىقپەن» اكتسياسى شەڭبەرىندە وقۋ­شىلاردى 100 پايىز وقۋلىقتارمەن قامتاماسىز ەتۋ ءۇشىن بيۋدجەتتەن 918 683 مىڭ تەڭگە قارجى بولىنگەن. ورالحان ءداۋىت, «ەگەمەن قازاقستان». جامبىل وبلىسى.